tere sitam ka bahut ghalghala sunai de
mere habib mujhe izn-e-lab-kushai de

milen jo hum to zamana guman kare kya kya
khuda-e-pak use qalb ki safai de

hain nakhwaton ke bhi kante gul-e-ibaadat mein
ghurur-o-kibr ka phal shakh-e-parsai de

ye kis qabil ke logon se rabt hai tera
ki jo bhi bazm se nikle teri duhai de

nizam-e-dahr mohabbat pe ustuwar karen
khuda hum ahl-e-mohabbat ko gar khudai de