ye kya kahte ho tujh se wasta kya
zara phir to kaho tum ne kaha kya

mila di khak mein turbat kis ki
are o jaane wale ye kiya kya

khuda ka shukr hai achchhe hain sahib
aji bimar-e-gham ka puchhna kya

sawal-e-wasl sun kar hashr dhaya
zara si baat par bigde hain kya kya

sabab kya yar tark-e-guftugu ka
batao to hui mujh se khata kya

tumhein fursat kahan zikr-e-adu se
kahun tum se main apna muddaa kya

diya dil us but-e-kafir ko 'shabnam'
are nadan ye tu ne kiya kya