teri talab mein mujhe sharmsar hona tha
rahin-e-minnat-e-lail-o-nahaar hona tha

jo mubtala-e-gham-e-rozgar hona tha
to dil pe apne zara ikhtiyar hona tha

firaqe-e-gul mein agar dil-figar hona tha
to har kali ko mera gham-gusar hona tha

jo mujh ko waqf-e-gham-e-intizar hona tha
to ahd-o-feal ka kuchh eatibar hona tha

tumhein to jalwa-fagan bar bar hona tha
ki is jahan ko zara sazgar hona tha