teri talash to kya teri aas bhi na rahe
ajab nahin ki kisi din ye pyas bhi na rahe

har ek samt khala hi khala nazar aaen
kharaba-e-dil-e-viran mein yas bhi na rahe

gham-e-firaq ki talkhi wo dasht hai ki jahan
koi qarib to kya aas-pas bhi na rahe

tera khayal hi par tol kar uda le jae
koi umid sharik-e-hawas bhi na rahe

tamam rang hai khushbu tamam khushbu rang
gulon se rang uda len to bas bhi na rahe

luta hai qafila-e-agahi do-rahe par
zamana-saz to kya khud-shanas bhi na rahe

kisi tariq se 'shahzad' dil ko samjha len
na muskurae magar yun udas bhi na rahe