teri ulfat ko jaga rakkha hai
dil mein tufan utha rakkha hai

ranj-o-rahat hain gile-shikwe hain
kaisa ghar-bar saja rakkha hai

us ka ehsan ki us ke dil ne
fasla hum se sada rakkha hai

waqt kyun ret sa phisla jae
hum ne mutthi mein daba rakkha hai

samne rahte hue bhi us ne
khud ko parde mein chhupa rakkha hai

shad har pal hain ki hum ne dil ko
khugar-e-dard bana rakkha hai

khar hai jis ki zaban us ne bhi
ghar ko phulon se saja rakkha hai

koi jumbish pas-e-parda ho kabhi
sar tere dar se laga rakkha hai

wo bhi kya dil hai ki jis mein 'anjum'
nam rakkha na pata rakkha hai