tez-rau pani ki tikhi dhaar par bahte hue
kaun jaane kab milen is bar ke bichhde hue

apne jismon ko bhi shayad kho chuka hai aadmi
raston mein phir rahe hain pairahan bikhre hue

ab ye aalam hai ki meri zindagi ke raat din
subh milte hain mujhe akhbar mein lipte hue

an-ginat chehron ka bahr-e-be-karan hai aur main
muddaten guzrin hain apne-ap ko dekhe hue

kin ruton ki aarzu shadab rakhti hai inhen
ye khizan ki sham aur zakhmon ke ban mahke hue

kat mein bijli se tikhi baal se barik-tar
zindagi guzri hai is talwar par chalte hue