thakan se dur har ek manzil-e-hayat rahe
tera khayal safar mein jo sath sath rahe

mita diya unhen khud waqt ke taqazon ne
jo log waqt ke marhun-e-iltifat rahe

har ek hadsa-e-zist se guzar jaen
hamare hath mein jo zindagi ka hath rahe

jo apni zat mein dariya bhi the samundar bhi
lab-e-furaat wahi tishna-e-furaat rahe

wo ajnabi ki tarah aaj hum se milte hain
tamam umr jo 'khusraw' hamare sath rahe