thi haqiqat ki wo tha khwab use jaane do
chand nikle the muqabil mere sirhane do

aql aur dil hue yakja ye tamasha tha ajab
ek maqsad tha nazar aae the begane do

ek par us ka tha sar dusre par ghair ka tha
ye to achchha hua the pas mere shane do

pasban hat gae qismat ne mera sath diya
us ne jab kah diya us ko mere pas aane do

shauq ka daw har ek thik pada dil ki suni
dil ne samjhaya wo sharmata hai sharmane do

tum ho mahrum to tum sabr hi pa jao 'suhail'
jis ne pai hai mohabbat use tum pane do