thoda bahut jo pyar mila gham-gusar se
wo bhi guman ne chhin liya qalb-e-zar se

hai kaun sa maqam mohabbat na puchhiye
nazdik aa ke ho gaya main dur yar se

aql-o-khirad ke dam mein uljhi hui hayat
kab tak fareb khaegi apne ghubar se

aaya ye shakh-e-gul ki tarah kaun jhumta
angdai le raha hai chaman bhi khumar se

dil ki zamin pe kis ne ye rakkha qadam 'shafiq'
aawaz kis ki aai is ujde dayar se