yaad teri siyah raaton mein
hai farozan hamari nazron mein

main ne un se kiya tha ek sawal
us ka aaya jawab barson mein

justuju ke diye rahen raushan
manzilen aur bhi hain qadmon mein

zindagani gar ek sawal nahin
umr kat jae kyon jawabon mein

abr-e-naisan phir aaj barsega
hain sadaf be-qarar bahron mein

nazren gustakh ho gain meri
kuchh ishaara tha un ki aankhon mein