thoda sa muskura ke nigahen milaiye
mujh ko meri hayat ka maqsad bataiye

mujh se bhi kuchh huzur talluq tha aap ka
yun be-murawwati se na daman chhudaiye

shayad kisi maqam pe main kaam aa sakun
mujh ko bhi sath lijiye tanha na jaiye

guzrega is taraf se bhi ek din hujum-e-gul
har-chand aap rah mein kante bichhaiye

'nasir' udasiyan to rahengi yunhi mudam
dhalne lagi hai raat koi git gaiye