to kya tadap na thi ab ke mere pukare mein
wagarna wo to chala aata tha ishaare mein

wo baat us ko batana bahut zaruri thi
wo baat kis liye kahta main istiare mein

mudam hijr-kade mein wo yaad raushan hai
kahan hai ai dil-e-nakaam tu khasare mein

mere alawa sabhi log ab ye mante hain
ghalat nahin thi meri rae us ke bare mein

faqir hai pa karamat kisi ne dekhi nahin
guzar-basar hi kiya karta hai guzare mein