tu aankh ke raste se mere dil mein utar ja
tu ashk-e-wafa ban ke in aankhon mein thahar ja

murjhae hue phulon ko ek rang naya de
ulfat ki ada ban ke tu raste se guzar ja

tu meri khizan-shab ke andheron ko kiran de
khushbu ki tarah dil mein har ek samt bikhar ja

khamosh hain alfaz mere un ko zaban de
is zulf se kah de kisi lamhe to sanwar ja

kuchh aur nahin dil mein tamanna magar ai jaan
tu pahle hi ek phul hai ab aur nikhar ja