tu apne phul se honton ko raegan mat kar
agar wafa ka irada nahin to han mat kar

tu meri sham ki palkon se raushni mat chhin
jahan charagh jalae wahan dhuan mat kar

phir is ke baad to aankhon ko sang hona hai
mili hai fursat-e-girya to raegan mat kar

chhalak raha hai tere dil ka dard chehre se
chhupa chhupa ke mohabbat ko dastan mat kar

tu jate jate na de mujh ko zindagi ki dua
main ji sakunga tere baad ye guman mat kar