tu bhi hairan-o-pareshan hai thaka hun main bhi
tere hamrah bahut dur chala hun main bhi

tu bhi us but ki ziyarat ka sharaf hasil kar
us ke qadmon pe kai bar jhuka hun main bhi

tu bhi masruf khilaunon mein hai yaadon se pare
ji ke bahlane ko kuchh dhund raha hun main bhi

tera hi charcha nahin shahr mein bazaron mein
kitne akhbar-o-rasail mein chhapa hun main bhi

log diwana agar kahte hain to sach hai 'asad'
apne bare mein yahi soch raha hun main bhi