tu harf-e-akhiri mera qissa tamam hai
tere baghair zindagi karna haram hai

karne hain tere jism pe ek bar dastakhat
taki khuda se kah sakun tu mere nam hai

hota hai guftugu mein bahut bar tazkira
yani hawa charagh ka takiya-kalam hai

pahle-pahal mili thi hamein shiddaton ki dhup
ab yun hai rabte ki sarae mein sham hai

aakhir mein bas nishan hain 'sahar' kuchh sawaliya
phir is ke baad dastan ka ikhtitam hai