tu jahan mein chaar-din mehman hai
is ke aage aur hi saman hai

aadmi ek khak ka putla hai bas
jism mein rangat hai jab tak jaan hai

kala-gora uncha-nicha jo bhi ho
aadmi wo hai ki jo insan hai

gar jahannum ki haqiqat jaan lo
rah jannat ki bahut aasan hai

kuchh tere aamal hi achchhe na the
apni barbaadi pe kyun hairan hai

kuchh nahin sare-jahan ki daulaten
aadmi ke dil mein gar iman hai