tujh mein kitna gum hun aur kitna nazar aata hun main
aata jata aainon ko munh dikha jata hun main

us ke baad agli qayamat kya hai kis ko hosh hai
zakhm sahlata tha aur ab dagh dikhlata hun main

naqsh-bar-diwar hun aur baat kar sakta nahin
aisi haalat mein bhi jo kahta hun manwata hun main

khaksari hi nahin ye gham-gusari bhi to hai
panw rakhta hun jahan mitti utha lata hun main

harf ke aawaza-e-akhir ko kar deta hun nazm
sher kya kahta hun khamoshi ko phailta hun main

din dhale kuchh der dhal jata bhi hun suraj ke sath
sham hote hi charaghon se ubhar aata hun main