tujhe bhi chain na aae qarar ko tarse
chaman mein rah ke chaman ki bahaar ko tarse

ilahi barq wo tute jamal par tere
kali ki tarah se tu bhi nikhaar ko tarse

tamam umr rahe mera muntazir tu bhi
tamam umr mere intizar ko tarse

na ho nasib mohabbat ki zindagi tujh ko
sukun-e-zist ko dhunde qarar ko tarse

dua hai 'qaisar'-e-mahjur ki yahi paiham
ki tu bhi jalwa-e-rukhsar-e-yar ko tarse