tujhe kaise ilm na ho saka badi dur tak ye khabar gai
tere shahr hi ki ye shaera tere intizar mein mar gai

koi baaten thin koi tha sabab jo main wada kar ke mukar gai
tere pyar par to yaqin tha main khud apne aap se dar gai

wo tere mizaj ki baat thi ye mere mizaj ki baat hai
tu meri nazar se na gir saka main teri nazar se utar gai

hai khuda gawah tere bina meri zindagi to na kat saki
mujhe ye bata ki mere bina teri umr kaise guzar gai

wo safar ko apne tamam kar, gai raat aaenge laut kar
ye 'nasim' main ne suni khabar to main sham hi se sanwar gai