tujh ko chhua to ghaaliya-sai nahin gai
hathon se bu-e-nafa-kushai nahin gai

ab zindagi ne rah mein makhmal bichha diye
lekin hamari aabla-pai nahin gai

tujh se bichhad ke hum ko zamana hua magar
lahje se ab bhi nauha-sarai nahin gai

tujh ko ganwa ke laute the ek sham ghar ko hum
ab tak wo sham hum se bhulai nahin gai

phir hum ne tere baad bhi ek umr kat li
pahle-pahal to sham bitai nahin gai

apna bhi ishq masnawi sahr-ul-bayan hai
lekin ye dastan sunai nahin gai