tujh se bichhdun to ye khadsha hai akela ho jaun
ghor tanhai ke jangal ka main hissa ho jaun

ek tere dam se hi shadab hai ye mera wajud
tu nazar pher le mujh se to main sahra ho jaun

dil ki diwaron pe marqum rahe nam mera
qabl is ke ki main bhula hua qissa ho jaun

tu agar dil mein basa le to banun main shair
tu jo honton pe saja le to main naghma ho jaun

aisa ho jae na sujhe tujhe kuchh mere siwa
aisa ho jae ki main hi teri duniya ho jaun

jaanta hun main teri surmai aankhon ka tilism
ek nazar mujh pe bhi main bhi tere jaisa ho jaun

main adhura hun bahut tujh se bichhad kar ai dost
tu jo mil jae dobara to main sara ho jaun