tujh se ek hath kya mila liya hai
shahr ne waqia bana liya hai

hum to hum the ki us pari-ru ne
aaine ka bhi dil chura liya hai

warna ye sail-e-ab le jata
shahr ko aag ne bacha liya hai

aisi naw mein kya safar karna
jis ne dariya ko dukh suna liya hai

kuza-gar ne hamari mitti se
kya banana tha kya bana liya hai

dekhiye pahle kaun marta hai
sanp ne aadmi ko kha liya hai

jaane walon ko ab ijazat hai
hum ne apna diya bujha liya hai

jab koi baat hi nahin 'ami'
aasman sar pe kyun utha liya hai