tum aa rahe ho ki ja rahe ho
batao kyon muskura rahe ho

ye kaisa jalwa dikha rahe ho
nigah-o-dil mein sama rahe ho

karoge kya khak khana-e-dil
nazar se bijli gira rahe ho

milega kya aisa kar ke tum ko
kyon mujh ko nahaq sata rahe ho

hai aarzi karr-o-far tumhaara
ye jashn jo tum mana rahe ho

manaega khair apni kab tak
jise tum ab tak bacha rahe ho

lahu pukarega aastin ka
jo qatl kar ke chhupa rahe ho

jahan mein kar dega tum ko ruswa
jo zulm 'barqi' pe dha rahe ho