tum hijr ke jhagdon ko mita kyon nahin dete
bigdi hui taqdir bana kyon nahin dete

dard-e-dil-e-betab ghata kyon nahin dete
mahfil se raqibon ko utha kyon nahin dete

kyon hai khafagi kis liye mathe pe shikan hai
taqsir meri aap bata kyon nahin dete

tum se jo kiya karte hain har-waqt daghaen
ai hazrat-e-dil un ko dua kyon nahin dete

majbur hun main kashmakash-e-ranj-o-alam mein
tum aa ke meri jaan chhuda kyon nahin dete

tang aae hain ham-saya jo fariyaad se meri
us shokh fusun-gar ko bula kyon nahin dete

ek bosa-e-rukhsar ka muddat se hun sail
hain aap agar ahl-e-sakha kyon nahin dete

wo puchhte phirte hain ki main kis ko mitaun
turbat ko meri log bata kyon nahin dete

marta hun main tum par jo kaha un se to bole
ye sach hai to phir mar ke dikha kyon nahin dete

wo tazkira-e-sadma-e-hijran pe shab-e-wasl
bole ki use dil se bhula kyon nahin dete

jab main ne kaha tum se hasin aur bahut hain
kis naz se bole ki dikha kyon nahin dete

kyon qatl ki pursish pe sar-e-hashr ho khamosh
ilzam raqibon pe laga kyon nahin dete

hai 'nashtar'-e-nashad jhukae hue sar ko
tum jauhar-e-shamshir dikha kyon nahin dete