tum ho mujrim hum hain mulzim chalo naya insaf karen
tum bhi hamein muafi de do hum bhi tumhein muaf karen

phir ujli kursi par baithen mulzim ka insaf karen
pahle munsif ganga-jal se apni niyyat saf karen

jis ne jitne qatl kiye hain un ka wo iqbaal kare
main maqtulon se kah dunga ab wo use muaf karen

ye bhi marham hai zakhmon ka hakim aur jallad sabhi
danga-pidit har basti ka nange pair tawaf karen

kuchh zahrile akhbaron ne sab ko mere khilaf kiya
un mein himmat ho to mere rab ko mere khilaf karen

aane wali naslon ko ye deti rahengi dars-e-wafa
nae musawwir taswiron mein mera lahu muzaf karen

ik-duje ke aansu le len ik-duje ko khushiyan den
pyar ki shama ka ye ujala aao har atraf karen

wote na bechen kyun bechaare bas kambal ke badle mein
jo sardi mein apni chamdi bistar karen lihaf karen

takht-nashinon ke qadmon par bose dene wale ab
ek nazar meri qurbani par bhi to ausaf karen

baadal farz-shanas nahin hai qaid hai ya zanjiron mein
shabnam ke qatre hi pyase 'panchhi' par altaf karen