tum itna mukhtasar kyon bolti ho
ki jaise ek mujassam khamushi ho

sar-e-mahfil nigahen kah chuki hain
mere kanon mein tum jo kah rahi ho

musalsal hichkiyan aane lagi hain
mere bare mein kitna sochti ho

mujhe kahti ho main sab bhul jaun
khud ab bhi meri ghazlen padh rahi ho

udasi dil mein yun utri hai jaise
koi jaun eliya ki shaeri ho

kai din ho gae bechain hun main
kai raaton se tum bhi jagti ho