tum se ye kab kaha hai ki akasr mila karo
mujh se mere junun ke barabar mila karo

main tum se jab milun to mukammal mila karun
tum mujh se jab milo to sarasar mila karo

nama barae nisf mulaqat bhul jao
takmil-e-kar-e-khair ko aa kar mila karo

milta nahin wajud ke bahar kisi se main
mujh se mere wajud ke andar mila karo

dad-e-jamal-o-husn sametun bila-hisab
milne ke baad mujh se mukarrar mila karo

mujh se nahin hai khas talluq tumhein to phir
auron ki tarah mujh se bhi hans kar mila karo

ye thik hai ki sirf taghayyur ko hai sabaat
mil kar bichhadne walo bichhad kar mila karo