tum usi ko wajh-e-tarab kaho hum usi ko bais-e-gham kahen
wahi ek fasana-e-ishq hai kabhi tum kaho kabhi hum kahen

kabhi zikr-e-mehr-o-wafa karen kabhi dastan-e-alam kahen
bade e'timad se wo sunen bade e'timad se hum kahen

jise inqalab na chhu saka use tu ne khud hi mita diya
wahi ek dil ka sanam-kada jise aabru-e-haram kahen

wahi dil-kharash si ek nazar jo ba-qadr-e-zauq hai neshtar
use koi tarz-e-sitam kahe hum ada-e-pursish-e-gham kahen

tujhe ye khabar nahin saqiya ki hai mai-kashon ka maqam kya
ye unhin ki wusat-e-qalb hai ki khud apne zarf ko kam kahen

hama-arzu hama-be-khudi hama-bandagi hama-be-kasi
yahi chand lamhon ki zindagi ise kyun na fursat-e-gham kahen

'qamar' is se hum ko gharaz hi kya hai sabhi se us ka moamla
jo khuda kahen wo khuda kahen jo sanam kahen wo sanam kahen