tumhaare hijr ki tafsir ho gae hum log
jo mit na pae to tahrir ho gae hum log

wo jis ne hum ko tasalli se paemal kiya
usi ke panw ki zanjir ho gae hum log

tumhein jo socha to rashk aaya zindagi pe hamein
tumhein jo dekha to taswir ho gae hum log

hamare khwab ki tabir mil na pai to phir
tumhaare khwab ki tabir ho gae hum log

jab apne aap mein khubi koi dikhai na di
to apne aibon ki tashhir ho gae hum log