tumhaare ishq pe dil ko jo man tha na raha
sitara ek sar-e-asman tha na raha

wo aur the ki jo na-khush the do jahan le kar
hamare pas to bas ek jahan tha na raha

tu apni fath ka ailan kar main haar gai
wo hausla ki mujhe jis pe man tha na raha

wahi kahani hai kirdar bhi wahi hain magar
jo ek nam sar-e-dastan tha na raha

sadaen doge palat kar kabhi to dekhoge
hamare dil mein ye mubham guman tha na raha