tumhaari yaad ke har shai se nazare nikalte hain
jo mujh se farz chhute un ke kaffare nikalte hain

duaon ka asar man ke labon se phut padta hai
main jab be-chaara hota hun kai chaare nikalte hain

kabhi masjid ki be-hurmat kabhi apman mandir ka
amir-e-shahr ke ghar se kai dhaare nikalte hain

kahan ka ilm kaisi degreeyan ye haal hai ki ab
jahan suraj talasho ghor andhiyare nikalte hain

yahi gar faisla hai aap ka to ye bhi sun lije
hamare sath yaadon ke kai dhaare nikalte hain