tut kar ahd-e-tamanna ki tarah
mo'tabar hum rahe farda ki tarah

shauq-e-manzil to bahut hai lekin
chalte hain naqsh-e-kaf-e-pa ki tarah

ja milenge kabhi gulzaron se
phailte jaenge sahra ki tarah

dekh kar haal-e-pareshan apna
hum bhi hans lete hain duniya ki tarah

kabhi payab kabhi tufani
hum bhi hain dasht ke dariya ki tarah

mahfil-e-naz mein rahiye lekin
dekhiye chashm-e-tamasha ki tarah

apne dushman se hun waqif 'tabish'
kisi derina shanasa ki tarah