yun naqab-e-rukh muqabil se uthi
chashm-e-sad-nazzara mushkil se uthi

bazgasht-e-shor-e-gharqabi sahi
koi to aawaz sahil se uthi

qafile hain kitne darmanda khiram
gard rahon se na manzil se uthi

tham kar dil kya uthe arbab-e-dard
ek qayamat teri mahfil se uthi

sar se bhi guzri hai tufan ki tarah
jab bhi koi mauj-e-khun dil se uthi

chashm-e-nazzara se manind-e-hijab
tohmat-e-nazzara mushkil se uthi