tute hue diwar-o-dar ujdi hui thi meri chhat
us ne kaha kya haal hai main ne kaha sab khairiyat

baraat ek aati hui mayyat koi jati hui
ye zindagi hai tah-ba-tah khulti nahin is ki parat

chehron ki rangat zard si mahfil hui kyon sard si
baqi agarche hum mein hai ab bhi wahi tab-o-sakat

insan pareshan dahr mein wahshi darinde shahr mein
yaksar badal kar rah gai kaise mere shahron ki gat

sarmaya-dari ka subu hai jis mein insan ka lahu
is se to achchhi hai kahin meri ye mai pine ki lat