tuti hui shabih ki taskhir kya karen
bujhte hue khayal ko zanjir kya karen

andha safar hai zist kise chhod de kahan
uljha hua sa khwab hai tabir kya karen

sine mein jazb kitne samundar hue magar
aankhon pe ikhtiyar ki tadbir kya karen

bas ye hua ki rasta chup-chap kat gaya
itni si wardat ki tashhir kya karen

saat koi guzar bhi len ji to len kabhi
kuchh aur apne bab mein tahrir kya karen