ubhar rahi hai kiran subh-e-zu-fishan ke liye
sanwar rahi hai faza husn-e-gulistan ke liye

meri fasurda ummidon ko kar diya khandan
ye iltifat-e-nazar ek shikasta jaan ke liye

khuda ke dar pe to sajda-kunan hai ek duniya
meri jabin hai faqat tere aastan ke liye

tere huzur mein aaya to kho gaya aisa
zaban khul na saki arz-e-dastan ke liye

unhen shikast-e-mohabbat ka khauf kya 'akhgar'
kafan-badosh jo nikle hain imtihan ke liye