udhar tum par jo aaya meri jaan-e-jaan shabab aadha
tadap uttha idhar mera dil-e-khana-kharab aadha

abhi main us ke jalwon se hua tha faizyab aadha
ki zalim ne utha kar phir giraya hai naqab aadha

dil-e-wahshi mera do husn ke paikar mein uljha hai
mukammal ek jawan hai dusri par hai shabab aadha

har ek nanga nazar aaega ek din dekhna tum bhi
abhi duniya-e-fashion mein hai aaya inqalab aadha

nawazish us ne mujh ko ghar bula kar is tarah se ki
kabhi roti mili aadhi kabhi khaya kabab aadha

visal-e-hijr mein us ke ye lazzat main ne pai hai
ki jaise koi phal ho aadha achchha aur kharab aadha

hua aakhir jahan se gol aaj ustad-e-'wahid' bhi
chalo achchha hua sar se tala yaro azab aadha