udna to bahut udna aflak pe ja rahna
hum ne kahan sikha hai zer-e-kaf-e-pa rahna

aankhon ko khula rakhna kis ke liye aasan hai
yan kis ko gawara hai aankhon ka khula rahna

jo mauja-e-baad aaya zardi ka payambar tha
eajaz se kya kam hai pedon ka hara rahna

baghon mein khiraman thi shahron mein pareshan hai
khushbu ko na ras aaya paband-e-hawa rahna

main zat ke sahra mein ta-umr na bhatkunga
ai shahr ke darwazo mere liye wa rahna