udte hain do-chaar parinde manzar dhundla dhundla hai
parde par ek gend lagi hai ya suraj ka saya hai

nannhi-munni gudiya jaisi surat thi ek ladki ki
ab wo lakhon ke majma mein train pakadti chidiya hai

qabu mein jitni thin baaten hum ne un ko rok liya
kuchh baaton ka munh se nikalna be-qabu ki jwala hai

kis se kis ko mat hui ya kis ne kis ko chhin liya
ye rishton ki asl hai pyare ye rishton ki mala hai

‘ali-zahir' ke dil se puchho dukh jo us ne jhele hain
kandhon par hai bojh sadi ka aankhon mein sannata hai