uljhanon mein hi ulajhti zindagani rah gai
bas wafaon ki badaulat shadmani rah gai

tum falak par chand ban kar raushni dete rahe
main mahakti si tumhaari raat-rani rah gai

khwab sab be-nur hain be-rang gum-sum raunaqen
zindagi tum bin kahan ab zafrani rah gai

dhal rahi hai shab udasi dard ka aalam hua
ye supurd-e-khak duniya fani fani rah gai

jism ko kar ke juda jag ho gaya masruf par
ruh mein thahri mohabbat ki rawani rah gai

ban ke dushman ye muqaddar pal sunahre le gaya
par hansi jis se 'adhar' par wo nishani rah gai