umid-e-mehr par ek hasrat-e-dil hum bhi rakhte the
tamanna wasl ki ai mah-e-kaamil hum bhi rakhte the

kabhi gulzar dagh-e-ishq se dil hum bhi rakhte hai
kabhi ek taza gulshan ai anadil hum bhi rakhte the

kisi din to wo bahr-e-husn aa kar zeb-bar hota
ki aaghosh-e-tamanna shakl-e-sahil hum bhi rakhte the

alag tu bazm se uth kar jo sun leta to kah dete
ki kuchh kuchh iltija ai zeb-e-mahfil hum bhi rakhte the

hamein be-maut kyun mara ajal tu kis liye aai
hawa-e-bosa-e-shamshir-e-qatil hum bhi rakhte the

hamare dil ka uqda kyun na ai ghuncha-dahan khola
hawas bose ki thi thodi si mushkil hum bhi rakhte the

karen ab kya kahan dhundhen ganwaya ku-e-gesu mein
kabhi yaadash-ba-khair ai hamdamo dil hum bhi rakhte the

hamara imtihan o qadar-andaz lazim tha
dil-e-majruh-o-muztar jaan-e-bismil hum bhi rakhte the

kiya pamal us ko kyun na tum ne sath sabze ke
tumhaare zer-e-pa ai jaan-e-jaan dil hum bhi rakhte the

nahin ab kasrat-e-dagh-e-junun se laeq-e-hadiya
kabhi dil peshkash karne ke qabil hum bhi rakhte the

haqarat se na dekho aaj hum ko ai pari-ruyo
kabhi tum sa koi zohra-shamail hum bhi rakhte the

ajab hai kya hui ulfat wo ai jaan donon jaanib ki
yahi dil tum bhi rakhte the yahi dil hum bhi rakhte the

yunhi shab bhar jala karte the yaad-e-shoala-e-rukh mein
yahi sozish kabhi ai sham-e-mahfil hum bhi rakhte the

lab-e-jaan-bakhsh par kya fauq dete chashm-e-fattan ko
ki 'anjum' kuchh tamiz-e-haqq-o-baatil hum bhi rakhte the