umid-o-bim ko hasil baqa kya
main kya hun aur mera muddaa kya

bara-e-sajda jhukti hai jabin kyon
qarib aaya kisi ka naqsh-e-pa kya

ye kyon tarikiyan chhai hui hain
umidon ka diya bhi bujh gaya kya

hamein to gham azal hi se mila hai
hamin hum hain hamara puchhna kya

main is tarz-e-takhatub ke tasadduq
wo farmate hain mujh ko ho gaya kya

mere gham ko khuda shadab rakkhe
mujhe ahl-e-jahan se wasta kya

mazaq-e-ishq ke mare hue hain
hamare gham ka 'basit' puchhna kya