ummid-e-subh khayal-e-bahaar kya kya kuchh
ganwa ke baithe hain hum jaan-figar kya kya kuchh

junun-qimash thi apni khirad ki duniya bhi
so bazm bazm sameta ghubar kya kya kuchh

wafa khulus murawwat sipas dildari
hue hain hum se gunah-e-kibar kya kya kuchh

tumhein sarisht-e-alam se raha ilaqa kab
ye hum hi the ki hue zer-e-bar kya kya kuchh

ye marhala bhi ajab hai ki be-sabaati-e-dil
dikha rahi hai sar-e-khwab-zar kya kya kuchh

sukut-e-shab mein faqat intizar tha tera
uga jo din to uge intizar kya kya kuchh

masil-e-barg-e-hina thi lahu ki nairangi
ki lakht lakht ubhaare nigar kya kya kuchh

shikast-o-fath hayat-o-mamat sud-o-ziyan
ye ek main hai mera intishaar kya kya kuchh

zaban rang ilaqa qabil jins nasab
har ek hai odhe hue ishtihaar kya kya kuchh

uthe jo shaikh-o-barahman ba-nam-e-dair-o-haram
nafas nafas mein uthe kar-zar kya kya kuchh

khuda-parasti kaho chahe khud-parasti kaho
hain fi-zamana yahi karobar kya kya kuchh

fareb makr riya khud-numai khud-gharzi
ye ujle chehre magar dagh-dar kya kya kuchh

dua bahaar ki bhule se mang baithe the
so shakh shakh khile hain sharar kya kya kuchh