umr guzar jati hai qisse rah jate hain
pichhli rut ke bichhde sathi yaad aate hain

logon ne batlaya hai hum ab aksar
baaten karte karte kahin kho jate hain

koi aise waqt mein hum se bichhda hai
sham dhale jab panchhi ghar laut aate hain

apni hi aawaz sunai deti hai
warna to sannate hi sannate hain

dil ka ek thikana hai par apna kya
sham jahan hoti hai wahin pad jate hain

kuchh din hasb-e-mansha bhi ji lene de
dekh teri thuddi mein hath lagate hain