umr guzri safar ke pahlu mein
khub se khub-tar ke pahlu mein

sans leta hai zauq-e-la-mahdud
khwahish-e-baam-o-dar ke pahlu mein

shar ko kya samjhe ye ghabi makhluq
shar kahan hai bashar ke pahlu mein

khush na ho aansuon ki barish par
barq hai chashm-e-tar ke pahlu mein

ab hamein kya koi sambhaalega
hum hain sailab zar ke pahlu mein

farsh par us ne li jo angdai
arsh aaya utar ke pahlu mein

aafiyat se bhi 'yaad' khud ko bachao
aafiyat hai khatar ke pahlu mein