un aankhon mein hum ne haya dekh li hai
nirali si tarz-e-jafa dekh li hai

tumhaare nahin bas mein kuchh ai tabibo
dawa hum ne sabr-azma dekh li hai

na aaega koi nazar mein hasin ab
tere husn ki intiha dekh li hai

karun naz qismat pe jitna bhi kam hai
kanakhiyon ki teri ada dekh li hai

khizan mein qafas se mili kya rihai
khataon ki sari saza dekh li hai

na sani mila koi apne chaman ka
zamane ki sari faza dekh li hai

masarrat ke aalam mein gum-sum hai 'shadan'
teri rahguzar us ne kya dekh li hai