un ka wada badal gaya hai
farda aansu mein dhal gaya hai

tanhai se kuchh hui hain baaten
tanhai se dil bahal gaya hai

mamul-e-nazar wahi hai lekin
mafhum-e-nazar badal gaya hai

ruk ja ai karwan-e-imroz
mazi mera kuchal gaya hai

sahil pe nigah aankh walo
andha tufan machal gaya hai

saghar mein sharab hai ki yaro
angara koi pighal gaya hai

kis shokh nigah ka tasawwur
rukhsaron pe rang mal gaya hai

utthega zarur ek na ek din
fitna filhaal tal gaya hai

saqi tere mai-kade mein aa kar
insan zara sambhal gaya hai

dekha ai inqilab tujh ko
taswir ka rukh badal gaya hai

maghrib ke ufuq pe hai tabassum
suraj mashriq mein dhal gaya hai

wo aae hain yaad sham-e-hasrat
ya koi charagh jal gaya hai

manzil pe 'shamim' ko na paya
shayad aage nikal gaya hai