un se mayus-e-iltifat nahin
go ba-zahir tawaqquat nahin

ishq hi wajh-e-mushkilat nahin
yun bhi gham se kahin najat nahin

ishq ki azmaten baja lekin
ishq hi maqsad-e-hayat nahin

jin ko aasaishen mayassar hain
wo bhi aasuda-e-hayat nahin

ishq hai tab-azma lekin
aap chahen to koi baat nahin

wo khafa aur ek jahan dushman
ab koi surat-e-hayat nahin

azm-e-takmil-e-'arzu' karte
zindagi ko magar sabaat nahin