un se milne ki iltija ki hai
dil-e-nadan ne ye khata ki hai

main khincha ja raha hun us ki taraf
ye kashish husn-e-fitna-za ki hai

khud-farebi mein mubtala rakh kar
zulm ki tum ne intiha ki hai

qaul aur feal mein tazad rawa
baat kuchh pir-e-parsa ki hai

daur-e-hazir ke peshwaon mein
khwahish-e-sim-o-zar bala ki hai

jite ji maghfirat ka khwahan hun
baat ab zahmat-e-dua ki hai

ye man-o-tu ki kar-farmai
zehn-e-adam ne ja-ba-ja ki hai

maqsad-e-zindagi samajh baitha
chashm-e-bina jo us ne wa ki hai

jhuk rahi hai 'azim' apni jabin
ye karamat to naqsh-e-pa ki hai